PSE-EEko lehendakarigai Eneko Andueza alderdiko gazteen adarrarekin (EGAZ) elkartu da, Enekoneta deitu dioten furgoneta aurkezteko, eta hautagaiak esan du «sozialismo gehiago» dela «nazionalismoaren alternatiba bakarra». Anduezaren aurpegia marrazturik duen furgoneta hori Arabako, Bizkaiko eta Gipuzkoako errepideetan ibiliko da kanpainan.
Gabriel Arrue JSE-Egazeko idazkari nagusiak azaldu duenez, “Enekoneta” izeneko furgonetarekin Euskadiko toki guztietara iritsiko dira, PSE-EEk bere hauteskunde-programan sartu dituen proposamen eta neurri gazte guztiak hara eramateko.
Arruek esan duenez, «Euskadiko Gazte Sozialistek eta Euskadiko Alderdi Sozialistak «gazteriari benetan eragiten dioten» gaiei buruz hitz egingo dute, «subiranotasunari edo independentziari buruz hitz egiten ari diren beste hautagai batzuen eta beste alderdi batzuen aurrean, baita gazteen benetako arazoetatik oso urrun dauden gaietan zentratuta dauden beste gazte-erakunde politiko batzuen aurrean ere».
Hala, nabarmendu du kanpainako furgonetarekin “gazteentzako proposamen sozialistak Euskadiko toki
guztietara eraman” ahal izango dituela, baita “etxebizitza, enplegua eta garraioak” arloko proposamenak eta neurriak ere, gazteen arazoetan oinarrituta.
Anduezak nabarmendu duenez, PSE oinarrizko alderdia da Eusko Jaurlaritzan «politika aurrerakoiak bermaturik egon daitezen». «Soilik PSEk» bermatu dezake, haren hitzetan, «pertsonak erdian jartzen dituzten politikak» egingo direla Gasteizko gobernuan.
Apirilaren 21ean «emaitza oso ona izango du PSE-EEk», Anduezaren arabera, «Euskadik behar duen alderdia» ei delako. «Aurkeztu gara programa aurrerakoi batekin, talde handi batekin, euskal gizartearen benetako arazoetan zentraturik, enpleguan, etxebizitzan, klima aldaketan eta berdintasunean».
Hautagai sozialistak esan du «nazionalisten arteko gudu bati buruz» ari direnek ahaztu egiten dutela zein den «nazionalismoaren alternatiba». Alternatiba hori «ez da independentismo gehiago», Anduezaren esanetan, «sozialismo gehiago» baizik.
Boto emaileen artean, %40k erabakiko dute botoa kanpainan, hautagaiak gogoratu duenez, eta segurutzat jo du herritarrek jakingo dutela bereizten «betikoarekin jarraitzearen eta zerbait desberdina egitearen artean, nazionalismoaren artean eta sozialismoaren artean».
